JO-Schiitour ufe Nünalpstock

Scho wo mer am Morge si z'Höchi losgfahre, isches Hudduwättr xi. Doch mir hei vou uf z'Landi-Wättr-App vertrout u si glich Richtig Sörebärg gfahre. Abr usgrächnet dert si no Rägewouche ghanget u der Schnee i ne Iisbahn verwandlet. Abr nach ere warme Schoggi im Kafi näb em Parkplatz heimers de glich gwagt use z'gah. Die erste paar Schrittä heimr im schwäre Sulz müesse mache, abr scho gli hei mer de d'Schneefaugränze erreicht u si mit Rüggewind gäge ufe gloffe. Es het de när gli mau aagfange schneie, u Näbu hets ou chli gha. Chli nach der erste Trinkpouse het sech aber de das ganze chli ufglöst. Drfür heimer no meh Wind bercho, u wo mer mit em Wind im Rügge de uf ene Krete si ufcho, hets üs aui bimene Haar wäg gluftet. Am Bode hets nume es paar veriischeti Strüücher gha, aber uf der andere Site hets e Wächte gha wo sogar der Chlöisu het beeidruckt. Viune het de das Erläbnis gad chli d'Kraft groubt, u so heimer imene Waudegge bi Sunneschiin gmüetlech z'Mittag gnoh oder probiert dür zwöi Meter Schnee der Bode füre z'grabe. D'Abfahrt isch geniau xi, chli sulzig das Ganze, abr nid allzu steil, so si aui sicher u xung unger aacho. We abr ufere nächschte Tour mau öppis schief würd gah, de wüsste mer iz dank ere Showiilag vom Chlöisu u em Joel wie me e Rettigsschlitte mit de Schii bout.
Für wider e chli zu Chräfte z'cho u z'Mami dahei ni z'arme Tage ässe, hei mer no e churze Abstächer i d'Kambly gmacht, wo sech de es paari hei Buuchweh zuezoge ;)
vor Martina -> Fotos