|
||
| 2014: Fotos + Berichte22. Jan 11: JO, Skitour Gurbsgrat23. Jan 11: A, Skitour Ammertenspitz06. Feb 11: A, Skitour Hockenhorn-Gitzifurggu 08. Jan 11: G, Lawinenkurs Rossberg 29. Jan 11: G, Skitour Schnierenhireli13. Feb 11: FaBe, Skitour Tossestand19. Feb 11: A, Skitour Ladholzhore12. März 11: G, Skitour Fromattgrat23.-26. März 11: G, Skitourentage Lämmeren01. Mai 11: SAC, Frühlingswanderung 05.-08. Mai 11: A, Tourentage Zermatt-Zinal21. Mai 11: SAC, Biketour 29. Mai 11: G, Bergwanderung Kiental29. Mai 11: A, Frauenklettern Bufaal 04. Juni 11: G, Bergwanderung Wandfluh14. Juni 11: G, Bergwand. Rosenlaui02.-03. Juli 11: FaBe, Bergwanderungen Moiry02. Juli 11: A, Klettern Pfriendler02. Juli 11: G, Bergwanderung Iffighorn16. Juli 11: A, Klettern Engstlenalp, Gental10.-14. Juli 11: G, Tourenwoche 4 Pässe12.-14. August 11: FaBe, Klettern Wildorn 13.-14. August 11, A, Hochtour Mittellegigrat 03.-04. Sept. 11: A, Klettern Grimsel 09.-15. Juli 11 Kibe und JO Lager 10. Sept 11: JO Klettern Gastlosen 24. Sept 11: SAC Biketour II 10. Sept. 11: G, Bergwanderung Sulegg13. Sept. 11, Senioren, Niesengipfel-Frutigen 08. Nov. 11: Senioren, Cholerenschlucht Foto-Upload |
Skitour Ammertenspitz (anstelle Mäggisserehorn) vom Sunntig, 23.01.2011 Bi froschtige Tämperature hei mir üs, unger Ruedis Fäderfüehrig, ufe Wäg, bzw. uf d Spur Richtig Ammertespitz gmacht. Zersch hetts afe einisch gheisse stäckle, stäckle, stäckle, u derbii chli warmi Finger überchoo. Sogar der Hämpe het es gstabeligs Gsicht gha, obwou är doch aus einzige e „Schnurepullover“ treit hett. Aber o dä hett er Cheuti möge trotze. De Fääli si de o d Haar z Bärg gstange u si hei sech mit Häng u Füess gwehrt u sech chuum wöue la aachläbe. Die Cheibe hei eifach im Rucksack ar Wermi wöue blibe. Aber da het aues wehre nüt gnützt, si hei ad Seck, oder besser gseit ad Schii müesse. Ihre Uftrag hei si de gar nid mau so schlächt gmacht. Churz nach em erschte Aastieg isch de ändlech d Sunne choo. Es paar Manne hei scho fasch wöue verhitzge u me het e paar Chleider chönne ablege. Es isch sehr guet gspuret gsii, der Ufstieg isch locker gange u mir si strammen Schrittes obsi gstabet. Mir si der Spur naa links ufe Ammertepass u vo dert uus übere Grat ufe Gipfu. Der Grat isch nid so ds Zähni gsii, wiu der Luft der Schnee verblaase het u d Ungerlag hert gfrohre isch gsii. Entweder Harschise aamache oder Schii abzieh u z Fuess die letschte 200 Meter obsi, öppis angers isch nid gäbig gsii. Die herte Kärline si natürlech bis zum geht nicht mehr uche u hei de nume die letschte paar Meter z Fuess erlediget. Ufem Gipfu hett sech de der Glanz vo däm sunnige Tag i vouer Pracht zeigt. D Sicht rundume isch wunderschön gsii u me hätt sech auso würklech ke bessere Touretag chönne wünsche! När no die Abfahrt, die isch der Hammer gsii! Pulverschnee bis über d Chnöiäcke, unverfahreni Häng, Stoubwulche u perfekt zogeni Spure. Es hett gfüüret die Oberschänkle, me hett so richtig öppis dervo gha. Der Räschte dür d Äbeni hett me de haut wider mit Ungerstützig vom Handbetrieb müesse zrugglege, aber bi däm Wätter kes Problem. Bim Bärtschi simer de ga iichehre uf der Terrasse. Nei haut, drei Unverwägeni hei no nid gnue puderet gha. Steffu, Brünu u Hämpe si bim Chinderlift äne no einisch obsi ufe Ärtelegrat u hei ihri Spure i Schnee zouberet. Ds Ergäbnis hett sech auso chönne la gseh! När isches du uf der Terrasse fasch wider so chaut worde wie am Morge u de simer Richtig Talstation gondelet. Es isch e absolut glungene Touretag gsi! Viu Sunne, viu Schnee, weni Lüt… was wott me no meh! Merci Ruedi für dini Erkundigunge u das mit em Petrus und er Frou Holle hesch o perfekt härebracht. Derbi gsi si Ruedi, Marcel, Hämpe, Bruno, Martin, Steffu, Melanie, Christa u die wo gschribe het, Sandra.
|